Ümumdünya Əməyin Mühafizəsi Gününə həsr olunmuş onlayn tədbir keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin rəhbər şəxslərinin və  100-dən çox işəgötürənin, əməyin mühafizəsi üzrə mütəxəssislərin iştirakı ilə 28 Aprel-Ümumdünya Əməyin Mühafizəsi Gününə həsr olunmuş onlayn tədbir keçirilib.

Tədbirdə Beynəlxalq Əmək Təşkilatı (BƏT) tərəfindən 28 aprel tarixinin Ümumdünya Əməyin Mühafizəsi günü kimi elan edildiyi və bu ilki Əməyin Mühafizəsi Gününün devizinin “Pozitiv təhlükəsizlik və sağlamlıq  mədəniyyəti yaratmaq üçün birlikdə hərəkət edək!” kimi müəyyən edildiyi diqqətə çatdırılıb.

Ölkəmizdə layiqli əməyin təminatı, o cümlədən işçilərin təhlükəsiz və sağlam əmək şəraiti ilə təmin edilməsi sahəsində aparılan dövlət siyasəti, bu sahədə beynəlxalq konvensiyaların ratifikasiyası  istiqamətində görülən işlərdən bəhs olunub. BƏT-in əsas işçi hüquqları ilə bağlı 58 Konvensiyasının (o cümlədən əməyin mühafizəsi ilə əlaqədar Konvensiyalarının), bir protokolunun Azərbaycan tərəfindən ratifikasiya edildiyi qeyd edilib.

Tədbir iştirakçılarına əməyin mühafizəsi prinsipləri və şərtləri barədə ətraflı məlumat verilib. İşçilərin təhlükəsiz və sağlam şəraitdə işləmək hüququnu təmin etmək məqsədi ilə Əmək Məcəlləsində və digər normativ hüquqi aktlarda, habelə kollektiv müqavilələrdə, sazişlərdə, əmək müqavilələrində nəzərdə tutulan texniki təhlükəsizlik, sanitariya, gigiyena, müalicə-profilaktika tədbirləri, normaları və standartları diqqətə çatdırılıb. İstehsalatda bədbəxt hadisələrdən icbari sığorta sahəsində işçi hüquqları barədə məlumat verilib.

Əməyin mühafizəsi üzrə ixtisaslaşan işçilərin sahə üzrə sualları cavablandırılıb, müvafiq izahlar verilib.