Əmək sahəsi üzrə 20 yeni milli standartın layihələri hazırlanıb

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin sədrliyi ilə fəaliyyət göstərən “Əmək sahəsində” standartlaşdırma (AZSTAND/TK 21) üzrə Texniki Komitə əmək sahəsi üzrə 20 yeni milli standartın layihələrini hazırlayıb.

Bu barədə Komitənin növbəti iclasında bildirilib.

Layihələrin əməyin təhlükəsizliyi və mühafizəsi, fərdi mühafizə vasitələri, istehsal avadanlığı, təhlükəsiz əmək şəraitinin yaradılması, təhlükəli və zərərli istehsalat amilləri və s. sahələri əhatə etdiyi qeyd olunub.

Yeni layihələrə dair fikir mübadiləsi aparılıb və onların təsdiq üçün təqdim edilməsi qərara qəbul olunub. Həmçinin əmək və peşə sahəsi, işlərin təhlükəsiz icrası, işçilərin sağlamlığının qorunması, standartlaşma işinin təşkili, habelə Komitənin gündəliyinə uyğun digər məsələlər müzakirə olunub.

AZSTAND/TK 21-də Əmək və Əhalinin Sosial Müdafiəsi Nazirliyi ilə yanaşı, Fövqəladə Hallar Nazirliyi, Dövlət Neft Şirkəti (SOCAR), Sahibkarlar (İşəgötürənlər) Təşkilatları Milli Konfederasiyası və Həmkarlar İttifaqları Konfederasiyası daxildir.