İsmayıllıda uşaqların əmək hüquqları mövzusunda maarifləndirmə tədbiri keçirilib

İsmayıllı şəhər Natiq Behdiyev adına 6 nömrəli tam orta məktəbdə “Uşaqların əmək hüquqları, məcburi əmək və insan alverinin qarşısının alınması” mövzusunda tədbir keçirilib.

Tədbirdə Dövlət Əmək Müfəttişliyi Xidmətinin Dağlıq Şirvan regional şöbəsinin, Dağlıq Şirvan Regional Təhsil İdarəsinin İsmayıllı Rayon Təhsil Sektorunun, İsmayıllı Rayon Polis Şöbəsinin Yetkinlik Yaşına Çatmayanlarla Profilaktiki İşin Təşkili qrupunun əməkdaşları və məktəbin yuxarı sinif şagirdləri iştirak ediblər.

Tədbirdə uşaq əməyinin istismarına qarşı mübarizənin əhəmiyyəti və uşaqların əmək hüquqlarının qorunması ilə bağlı görülən işlərdən bəhs edilib, həmçinin məcburi əməyin və insan alverinin qarşısının alınması üçün birgə tədbirlərin görülməsinin vacibliyi vurğulanıb.

Qeyd edək ki, tədbir “İnsan hüquqları aylığı” çərçivəsində, həmçinin Əmək və Əhalinin Sosial Müdafiəsi Nazirliyinin “Azərbaycan Respublikasının Nazirlər Kabineti yanında Uşaq hüquqlarının müdafiəsi üzrə Komissiyanın 2025-ci il üçün Tədbirlər Planı”nın icrasının təmin edilməsi barədə”  əmrinin icrası ilə bağlı təşkil olunub.